Bir kúnde 9 bilim uıasy ashyldy

Qyzylorda oblysynda bir kúnde 8 mektep pen 1 balabaqsha ashyldy. Ádette mamyrajaı zaman boldy dep eske alatyn Keńes zamanynyń ózinde mundaı jaǵdaı bolmaǵan shyǵar-aý. Naq oqý jylynyń aldynda buǵan deıin eski nemese apatty jaǵdaıdaǵy bilim oshaqtarynda oqyp jatqan balalardyń sý jańa mektepke kóshýi kóńilimizge qýanysh uıalatty. Munyń syrtynda taǵy úsh mektep qyrkúıek aıyna deıin ashylady dep josparlanyp otyr.   Bilim salasy – basty nazarda «Biter istiń basyna, jaqsy keler qasyna» demekshi, oqýshylardyń qýanyshyn bólisýge Bilim jáne ǵylym mınıstri Aslan Sárinjipov Astanadan arnaıy kelip, aımaq basshysy Qyrymbek Kósherbaevpen birge bilim oshaqtarynyń ashylý saltanatyna qatysty. Aral aýdanynyń Jińishkequm, Qosaman jáne Jańaqurylys aýyldarynda birdeı úsh mektep boı kóterse, atalǵan aýdanda taǵy bir mektep pen balabaqshany qyrkúıek aıyna deıin paıdalanýǵa berý josparlanyp otyr. Qazalynyń Arandy, Sarybulaq eldi meken­derinde 100 oryndyq 2 bilim uıasy iske qosylyp, Qarmaqshy aýdanyna qarasty Aqaı aýylynda 280 balaǵa arnalǵan balabaqsha paı­dalanýǵa berilse, taǵy 600 oryndyq mekteptiń qurylysy da bitýge jaqyn. Dál osyndaı jańalyqtan Syrdarııa aýdany da quralaqan emes. Shaǵan aýylynda bul kúni 900 oryndyq bilim oshaǵy esigin aıqara ashsa, jańa oqý jylyna deıin Shirkeıli aýylynda da 600 oryndyq mektep el ıgiligine beriledi. Shıeli aýdany Bala bı aýylynyń oqýshylary da 900 oryndyq mekteptiń ashylýyna kýá boldy. Sonymen qatar, Qyzylorda qala­syndaǵy oqýshylar úshin 900 kelýshige arnalǵan mektep paıda­lanýǵa berildi. Dál osyndaı taǵy bir oqý oshaǵy qyrkúıek aıynda «Ippodrom» shaǵyn aýdanynda ashylady. Zamanaýı úlgide salynǵan bul mektepterdiń barlyǵynda oqýshylardyń sapaly bilim alýlaryna tolyq jaǵdaı jasalǵan. Sonymen qatar, bıyl óńirdegi mektepter jyldaǵydaı qyr­kúıekte emes, qazirdiń ózinde 100 paıyz oqýlyqpen qamtylyp otyr. Aldaǵy oqý jylynda 5 myńnan astam bala alǵash ret jańa mektep tabaldyryǵyn attamaq. Bilim jáne ǵylym mınıstri Aslan Sárinjipov pen Qyzylorda oblysynyń ákimi Qyrymbek Kósherbaev oqýshylarǵa jańa oqý jylyna sáttilik tilep, kompıýtermen jabdyqtalǵan kabınet jáne Elbasynyń atynan 1-synyp oqýshylaryna kitaptar tabystady. – Bıyldyń ózinde Qyzylorda oblysynda 22 bilim nysanyn salýǵa 6,5 mıllıard teńge bó­lindi. Jyl sońyna deıin 19 mektep pen 4 balabaqsha paıdalanýǵa beriledi. Osylaısha, Elbasynyń bizge júktegen úsh tapsyrmasy tolyq oryndalýda. Birinshiden, úsh aýysymdyq mektepter máselesi sheshildi. Endi Qyzylorda oblysynda úsh aýysymmen oqıtyn mektep múldem joq. Ekinshiden, apattyq jaǵdaıdaǵy mektepterdi 2016 jylǵa deıin tolyq jańalaımyz. 2013 jyly Qyzylordada 25 apattyq mektep bolsa, onyń 14-i qaıta salynyp, qalǵan 11 bilim oshaǵyn kelesi jyldyń sońynda bitirýdi josparlap otyrmyz. Úshinshiden, Elbasy 2020 jylǵa deıin «Balapan» baǵdarlamasyn tolyq júzege asyrýdy tapsyrǵan bolatyn. Al biz jyl sońyna deıin balalardy 100 paıyz balabaqshamen qamtyp, baǵdarlamany bekitilgen ýaqytynan buryn aıaqtaımyz, – dedi Qyrymbek Eleýuly. – Elbasy jyl saıyn respýblıkada 100 mektep salýdy tapsyrǵan bolatyn. Bul jumystardy júzege asyrýda Qyzylorda oblysy kósh bastap keledi. Elimizdegi aımaqtar arasynda bilim salasyna úlken mán berip, bilim oshaqtaryn ashýda da aldyńǵy orynda. Osyndaı bilim salasyna kórsetilgen qam­qorlyqtyń arqasynda bıyl Syr óńiriniń túlekteri Ulttyq biryńǵaı testi­leýdiń qorytyndysy boıynsha aldaǵy besinshi orynǵa shyqty, – dedi mınıstr.

Úzdik mektepke 17 mıllıon teńge berildi

Sońǵy 2 jylda Qyzylorda oblysy respýblıka boıynsha áleýmettik salaǵa kóp qarjy bó­letin aımaqtardyń kóshin bastap keledi. Bul jumystardyń nátıjesi de joq emes. Bıylǵy oqý jylynda UBT qorytyndysy boıynsha Syr óńiri 13-orynnan aldyńǵy bestikke kóterildi. Myńdaǵan qyzylordalyq jas túlek oblys ákimi granttaryn ıelendi. Sondaı-aq, Reseı Federasııasy Úkimeti arasyndaǵy kelisimge sáıkes 321 túlek Máskeý jáne Sankt-Peterbýrgtyń mańdaıaldy joǵary oqý oryndarynda tegin bilim alýǵa múmkindik alyp otyr. Budan bólek, joǵary jáne arnaıy oqý oryndaryna bólinetin «Serpin» baǵdarlamasymen de qyzylordalyq jastar tegin oqýǵa joldama aldy. Aıta ketý kerek, talaı jyldan beri talqyǵa túsip kelgen Baıqońyrdaǵy mektepterdiń problemasy bıyl oń sheshimin tapqan bolatyn. Endi olarǵa qazaqstandyq bilim standartyna saı oqýlyqtar jetkizilýde. Bilim jáne ǵylym mınıstriniń Qyzylorda oblysyna sapary barysynda «Bilim berý mazmunyn jańartý: bolashaqqa baǵdarlaný» atty bilim berý qyzmetkerleriniń tamyz keńesi ótti. Bıyl aımaqtaǵy bilim salasyna 66 mıllıard teńgeden astam qar­jy qaraldy. Sońǵy úsh jyldyń ishinde bul salaǵa bólinetin qarjy ese­lenip ósti. Sonyń arqasynda kúr­meýi qıyn máseleler sheshimin tapty. – Maǵan ákim retinde atqarǵan jumystardyń ishindegi erekshesin aıtyńyz dese, bilim salasyndaǵy jetistik der edim. О́ıtkeni, bilim kúr­deli júıe. Qyraǵy túrde qada­ǵalaý qajet. Biz taǵy bir joba­ny qolǵa aldyq. 22 bilim osha­ǵyn ınnovasııalyq mektepke aınal­dyrmaqpyz. Iаǵnı, óńirdegi bilim oshaqtaryn Nazarbaev mektebi úlgisinde jaraqtandyramyz.Ustaz­dardy oqytý kerek. Oǵan qyrýar qarjy qajet. Biraq bolashaqqa ınvestısııa salýdan bas tarpaımyz, – dedi tamyz keńesine qatysqan Qyrymbek Kósherbaev. «О́ńir jas kadrlarǵa senim artýymen erekshelenedi. Máselen, 25 jasqa deıingi muǵalimderdiń úlesi respýblıkada 11 paıyz bolsa, bul Qyzylordada 16 paıyzdy quraıdy. Endi magıstr dárejesi bar pedagogtardyń sanyn art­­­tyrýǵa baılanysty jumys jasaý qa­jet», – dedi Bilim jáne ǵylym mınıs­tri Aslan Sárinjipov. Jıyn sońynda bilim salasynyń damýy­na aıryqsha úles qosyp júrgen birqatar muǵalimder «Y.Al­tynsarın», «Bilim berý isiniń Qurmetti qyzmetkeri» tósbel­gilermen jáne mınıstrlik pen oblys ákiminiń Qurmet gramotasymen jáne Alǵys hatymen marapattaldy. Sondaı-aq, «Úzdik orta bilim uıymy» gran­tyn №9 oblystyq daryndy balalarǵa arnalǵan qazaq-túrik lıseıi ıelendi. Mektep ujymy 17 mıllıon teńgeniń sertıfıkatyn aldy. Bul mektepten 2 halyqaralyq olımpıadalardyń jeńimpazy shyqty. UBT qorytyndysynda ortasha 105,5 ball jınady. Bul eseli eńbektiń jemisi. Erjan BAITILES, «Egemen Qazaqstan». Qyzylorda oblysy.